"اخسر وزنك تكسب صحتك

نتابع مع الدكتور "محمد أبو الغيط" الريجيم في رمضان.. هايساعدنا إننا نجد حافز يدفعنا للانتظام في الريجيم، وخاصة أن "سفرة" رمضان وأطباقها الجامدة جداً بتخلينا نضعف ونبطل ريجيم... والحجة "الدنيا صيام"، والجو حر "جوع" و"عطش"، هانعمل إيه؟!!

أصعب حاجة في الريجيم قرار البداية... فما بالك في رمضان وبيوتنا تتنافس في المحمرات والحلويات ازاي نبدأ!!
رمضان شهر مهم جداً للناس اللي عاوزه تخس وتحقق رقم على الميزان، وخاصة من يلجأ للريجيم من أجل هدف محدد بمعنى لو لواحدة خطوبتها في العيد... بالمناسبة لاحظت من خلال عيادتي أن العيلة اللي منتظرة مناسبة بعد رمضان بيعملوا ريجيم مع العروسة بدءاً من الأم وحتى بنات الأقارب عشان الفستان والصور والفرح والبحث عن عريس بالمرة..!!.
وكمان لو واحد بيدور على وظيفة وشايف إنه لازم ينزل شوية عشان يكون شكله معقول في البدلة.. وعلى كل الأحوال البحث عن حافز يساهم جداً في تحقيق معدلات مرتفعة في إنقاص الوزن.
رمضان فرصة مميزة وحقيقية فنحن نمتنع عن الأكل لمدة تزيد على 12 ساعة.. في الأيام العادية بنستعين بالدواء عشان نقلل من الأكل وإيقاف الشهية.. في الصيام الامتناع عن الأكل إجباري وبكده نصف المهمة تتحقق– يعني مش هاقدر "ألخبط" خلال اليوم..!

وعشان نستفيد عمليا لو مافيش مناسبة بعد العيد تدفعنا للريجيم... نحط هدف تاني مهم...!!!

نعمل إيه..؟
رمضان السنة دي جاي آخر الصيف... ومنطقي جدا إننا في الإجازات من الصعب نعمل ريجيم أو نحافظ على وزننا عشان كده أكيد رمضان فرصة للتخلص من الكام كيلو اللي زنادهم بسبب اللخبطة في الأكل خلال فصل الصيف... عشان نستقبل فصل الشتاء واحنا وزننا أخف.
كانت لي تجربة رمضان الماضي في برنامج (القاهرة اليوم) مع "عمرو أديب" اخترنا خمسة متسابقين يتبعون ريجيم معين طوال شهر رمضان واللي هايحقق أعلى رقم في النزول بيحصل على جائزة كبيرة وفعلاً في النهاية فاز من فقد من وزنه 12 كيلو جرام – رغم اعتراضي على الوزن لأنه يفوق المعدل المسموح به خلال الشهر- إلا أنه استطاع أن يحقق الهدف والفوز بجائزة البرنامج وكذلك باقي المتسابقين كان أهم مكسب إنهم خسروا وزنهم وكسبوا صحتهم... معني كده إنه كلما وجدنا حافز هايتولد داخلنا طاقة وإصرار على اتباع ريجيم.
أنواع الريجيم في رمضان؟
فيه نوعين من الريجيم..
النوع الأول: ريجيم معقول ممكن نخس عليه لو اتبعناه بدقة من 2-3 كيلو وهو مخصوص للناس اللي عاوزاه وخايفة تتخن في رمضان بس مش هاتقدر تقاوم القطايف والخشاف والحاجات الحلوة.. هايكون للمجموعة دي نظام هايكون منشور على الموقع – وأرجو من قرائنا يبعتوا بالنتائج أول بأول –ولو بتواجههم مشاكل يبعتوا عشان أقدر أساعدهم فيها المهم في نهاية كل أسبوع نوزن نفسنا ونراقب النتيجة.
النوع الثاني: الريجيمات العادية التي نتبعها في الأيام العادية هذا الريجيم هو ريجيم قاسي شوية لو اتبعناه في رمضان، ولكن نتيجته مضمونة جدا وممكن المريض يحقق رقم ممتاز ويخس عدد كبير من الكيلوات بنهاية رمضان على أقل تقدير ممكن يخس 5- 6 كيلو أو أكتر بشرط أن يجعل وجبة الغداء هي وجبة الفطار ووجبة العشاء الساعة 12 ووجبة السحور الساعه 4 وهي وجبة الإفطار في الأيام العادية وممكن يتخلى عن وجبة السحور ويكتفي بوجبة العشاء ويعتبرها السحور.

وطبعا نوزن كل أسبوع وتبعتوا النتيجة...
لازم يكون في اذهاننا معلومة مهمة جداً أن الجسم لا يحرق السعرات الحرارية بكفاءة في رمضان؛ لأن معدل الحرق بيكون أعلى في النهار عشان كده كثرة الصلاة والعبادة بتساعد جداً الجسم في تعويض البطء في الحرق الريجيم والصلاة هاتخلي النتيجة مرضية جدا.
ياترى ممكن نحصل على وجبة حرة..!!

طبعا من الممكن أن نحصل على وجبة حرة في الأسبوع خلال الأيام الثلاث الأولى من كل الريجيم وممكن "نأجلها" ليوم في عزومة أو هانخرج مع أصحابنا أو عندنا إفطار جماعي أو أي مناسبة يتعذر فيها أن نفطر وجبة ريجيم وناكل في الوجبة أي حاجة نفسنا فيها بحرية لكن طبعا دون إسراف.